Skólastrákurinn

Ég veit...

2007-07-22T17:41:00.000Z

Að þú lest bloggið mitt!

Hver þú ert!

Hvar þú átt heima!

Hvað þú gerir!

Hvað þú heitir!

Þið eruð ekki örugg....

Íslenska leiðin - Rannsókn eftir Skólastrákinn.

2007-07-20T20:46:00.000Z

Fyrir ekki svo löngu síðan var mikil umræða í fjölmiðlum um mótorhjólamenn og ofsaakstur þeirra. Sú umræða átti vissulega rétt á sér. Skólastrákinum finnst þó eins og að umræðan um hinn venjulega ökumann eigi sér ekki stað.

Skólastrákurinn hefur undanfarið orðið mikið var við dónaskap, tillitsleysi, glannaskap og kæruleysi í umferðinni. Í kjölfar þess fór hann í mikla rannsóknarvinnu og birtir hér með niðurstöður rannsóknar sinnar.

Hraði:
Mikið ber á hraðakstri hjá íslenskum ökumönnum. Eftir að hafa stöðvað ökumenn á förnum vegi og beðið þá um að ljúka stuttum spurningarlista komu eftirfarandi svör oftast fyrir.

Ég er bara svo vanur að keyra þennan veg.

Vegurinn er svo breiður og gott færi.

Ég var bara að reyna að halda umferðarhraða.

Mér finnst bara að það ætti að keyra hraðar hérna.

Glöggur lesandi sér greinilega að þetta eru bæði kjánaleg og óréttlætanleg svör að öllu leyti. Eftir að hafa greint gögnin og tekið endurtekin viðtöl við þátttakendur hefur skólastrákurinn komið með rétt svar. Svarið er nú ekki mikið flóknara en það að ýmist eru þessir ökumenn líklega ólæsir eða illilega lesblindir. Skólastrákurinn gerir sér fyllilega grein fyrir því að það er mjög flókið og erfitt að lesa á skilti þar sem eru stórir svartir stafir á gulum bakgrunni. Sérstaklega þegar ökumenn eru á öðru hundraðinu. Líklegt er að íslendingar, sem eru samkvæmt gögnum flestir ólæsir eða lesblindir, ráði ekki við það hugræna ferli sem þarf að öllu jöfnu að eiga sér stað við túlkun umferðarmerkja.

Gatnamót og umferðarljós:
Skólastrákurinn náði ekki tali af íslendingum á gatnamótum eða við umferðarljós. Ástæðan var sú að ökumenn voru önnum kafnir við að bíða eftir næsta bíl, svo hægt væri að svína. Algengt vandamál sem skólastrákurinn tók eftir var að ökumenn fórum ótt og títt yfir á rauðu ljósi. Lífeðlislegar rannsóknir hans á hvítum rottum gefa mögulega útskýringu á þessu. Sökum þess hversu “takmarkaðir” sumir íslendingar eru hafa þeir að öllum líkindum eytt drjúgum tíma í barnæsku í það að stara á sólina. Eftir að hafa starað svo lengi á rauð/gula sólina hafa ákveðnar andstæðufrumur í sjónberki eyðilagst og orsakað stanslausa græna eftirmynd. Þessi græna eftirmynd leggst svo yfir rauðu ljósin og heldur ökumaðurinn þá að það sé grænt ljós hjá honum.

Stefnuljós:
Annað lítt þekkt en engu að síður grafalvarlegt vandamál hjá íslenskum ökumönnum er notkun stefnuljósa. Samkvæmt heimildum skólastráksins hjá lögreglunni virðast margir ökumenn telja þetta vera skraut og nýta það einungis í kringum jólatíð. Vegfarendur þekkja væntanlega þá sjón að sjá hvern bílin á fætur öðrum út í kanti yfir vetratímann með þessi blikkljós í gangi. Önnur ástæða lítillar notkunar stefnuljósa getur verið að íslendingar eiga til með að dragast að öllu sem er skært og fallegt. Þá óttast ökumenn að einhver keyri aftan á þá þegar þeir noti stefnuljósin og sleppa þeim því í öryggisskyni.

Í kjölfar þessarar rannsóknar hefur Skólastrákurinn sett saman lista yfir nokkur atriði til að pirra íslenska ökumenn.

Keyrðu á löglegum hraða. Ef þú keyrir á 70 þar sem hámark er 70 eru allar líkur á því að næsti bíll keyri upp í afturendann á þér. Hafðu augun í baksýnispeglinum þannig nærðu góðu útsýni yfir andlit ökumannsins fyrir aftan þig.

Gefðu stefnuljós. Þetta er víst til þess að vekja óöryggi hjá öðrum ökumönnum í kringum þig, enda þekkja fæstir ökumenn þetta ljós.

Stoppaðu við STOP-merki og athugaðu hvort einhverjir bílar séu að koma áður en þú leggur aftur af stað. Slík skynsemi og löghlýðni fer óendanlega í taugarnar á hinum hagsýna íslendingi sem vill spara bremsuklossa og bremsuvökva á slíkum gatnamótum.

Gefðu séns og hleyptu bílum framfyrir þig eða hægðu á þér til að leyfa öðrum að klára að fara yfir gatnamót. Þessi aðgerð kemur í veg fyrir að aðrir ökumenn njóti þess að stofna sjálfum sér og öðrum í hættu og vekur óhemju mikla reiði.

Stoppaðu fyrir fólki við gangbrautir. Það er alltaf skemmtilegt að fylgjast með viðbrögðum gangfarandi þegar þetta gerist. Sérstaklega þegar þeir falla niður í jörðina og hnipra sig saman vegna ótta við það að þú ætlir að keyra yfir þá.

Þessi atriði og mörg önnur tengd skynsemi, tillitssemi, löghlýðni og greind eru góð leið til þess að pirra næsta ökumann. Prófaðu þetta og gáðu hvað gerist.
------------------------------------------------------------------------------------------------
Ps.
Þess má geta að nú fyrir ekki svo löngu lentu skólastrákurinn og heitt elskuð ambátt hans í því að það var flautað á þau. Ástæðan var sú að þau höfðu keyrt á 70KMH allan tímann meðan það var 70KMH hámarkshraði. Aldrei á ævi þeirra höfðu þau séð eins hneykslaðan ökumann.

Hlaut að vera... uppfærsla

2007-07-16T21:28:00.000Z

----HÉR ÁTTI AÐ VERA STUTT ÚTTEKT Á DAUÐA MÍNUM, ORSÖK OG ALDRI. GREININ HEFUR VERIÐ RITSKOÐUÐ AF RÚV ---

Ostaveisla fer úr böndunum

2007-07-04T13:28:00.000Z

Hrikalegt slys átti sér stað nú nýverið á pizzastað í Reykjavík.

Fyrr í morgun bárust fregnir á fréttastofu skólastráksins að ungur karlmaður hefði látist eftir að hafa pantað sér ostapizzu með aukaosti. Þegar pizzan var borin fram kom í ljós að maðurinn réði ekki við allann ostinn. Fyrsta sneiðin sem hann tók upp innhélt svo mikinn ost að hann festi fingur í honum. Maðurinn, sem að sögn þjóna var óreyndur á sviði pizzaáts, reyndi samstundis að leysa fingurinn en festi sig meira í kjölfarið. Kokkar á veitingastaðnum kölluðu eftir hjálp slökkviliðsins sem mættu samstundis. Þegar þeir komu að manninum kom í ljós að hann væri orðinn það flæktur í ostinn að það þyrfti að kalla út tækjabílinn og reyna að klippa hann út. Í öllu óðagotinu missti maðurinn stjórn á sér. Í kjölfarið náði ostaflækjan upp fyrir bringu og náði að vefjast utan um hálsin á honum.

Talið er að maðurinn hafi ekki getað séð hvað hann var að gera vegna ákveðinna gastegunda sem bárust í augu hans þegar gráðaostur og brie ostur náðu að blandast saman.

Að sögn verslunarstjóra staðarins var nýr kokkur á vaktinni og gerði sér ekki grein fyrir vanþekkingu viðskiptavinarins á ostapizzum."Hann hefði aldrei átt að leyfa honum að fá aukaost á pizzuna."

Vísindamenn hafa nú til margra ára lagt tugþúsundir vinnutíma í það að skilja hvernig þessar ostapizzur virka og hvað veldur þessari hættulegu virkni þegar aukaost er bætt við. Samkvæmt heimildum skólastráksins þá margfaldast þéttleiki ostsins ásamt því að ákveðinn togkraftur myndast þegar osturinn byrjar að kólna.

Talið er að ef pizzan hefði ekki náð að kólna svona hratt þá hefði verið hægt að bjarga manninum.

Skólastrákurinn mun fylgjast meira með málinu.

Allt er nú til!

2007-07-03T19:35:00.000Z

Islamophobia. Órökréttur ótti í tengslum við Islamtrúað fólk.

Islamophobia vísar til þess einstaklings sem ber mikinn ótta eða hatur í garð múslíma eða eru Islamstrúar.

Sá eða sú sem er þjakaður af Islamophobiu trúir því að:

Allir eða flestir múslímar séu trúarofstækisfólk.
Allir múslímar séu ofbeldishneigðir gagnhvart öllum þeim sem eru ekki múslímatrúar.
Allir múslímar styðji og séu hlynntir hryðjuverkum.
Allir múslímar hafna jafnrétti, umburðarlyndi, lýðræði og mannréttindum.
Allir múslímar hafa önnur gildi en aðrir, hafa ekki skilning á viðhorfum annarra og geta ekki tekið breytingum.

Sá eða sú sem er þjakaður af Islamophobiu trúir því einnig að:

Vestræn gildi séu að öllu leyti betri en viðhorf múslíma sem séu ósiðmenntuð, órökrétt, frumstæð og niðurlægjandi fyrir konur.
Islam sé pólitísk hugmyndafræði sem sé notuð í pólitískum og hernaðarlegum tilgangi.
Fólk sem er sárlega þjakað af þessum hrikalega sjúkdómi er heldur ekki tilbúið til að hlusta á gagnrýni múslíma varðandi neikvæð viðhorf eða hugsanagang í hinum vestræna heimi.

Þessar hugmyndir um Islam og múslíma eru svo notaðar til að réttlæta mismun í garð múslima og útilokun múslíma frá samfélaginu. Með þessu réttlætir fólkið neikvæð viðhorf til múslíma og hegðun í garð múslíma og það talið vera eðlilegt.

Nú spyr skólastrákurinn: Er það ekki aðeins of langt gengið að búa til sjúkdóm sem tengist þessu. Getum við ekki bara kallað þetta fólk fáfrótt, þrjóskt, sjálfhverft og vitlaust. Þurfum við virkilega að réttlæta slíka hluti með því að búa til sjúkdóm. Getum við ekki bara sagt þessu fólki að kynna sér málið?

Ætli ég sé kannski með Islamophobicassholeaphobia.

Vestur-landa-ævin-týri.

2007-06-25T16:50:00.000Z

Skólastrákurinn fór ásamt sinni heitt elskuðu til Flórída nú ekki fyrir löngu. Mennningarsjokkið var gífurlega mikið og sterkt en áður en hann vissi af hafði fólk aðlagað sig að komu hans og fögru meyjar hans svo að lífið hélt sinn vanagang áfram í Flórída.

Dvöl Skólastráksins og fylgdarfrú hans entist rétt rúmar tvær vikur og er ekki hægt að segja annað en að ferðin hafi verið kostuleg í alla staði. Þar sem að hótel þykir ekki nógu fínt kom ekki annað til greina en að koma sér fyrir í lúxus húsi sem var búið öllu. Húsið var stórt og rúmgott með um það bil milljón svefnherbergjum og einni risastórri sundlaug. Með húsinu fylgdi bílskúr sem var ríkulega búinn og innihélt eitt stykki lúxusbíl.

Dagarnir þarna úti liðu hægt og rólega og er greinilegt að beiðni Skólastráksins og meyjar hans til tímaguðsins hafi komist til skila. Dagarnir runnu í eitt þarna úti og liðu í sæluvímu. Það var einn hængur á ferðinni en hann var sá að Skólastrákurinn er ekki enn orðinn fullvaxta karlmaður úti í Flórída að mati sumra tryggingafyrirtækja og neyddist hann til að vera farþegi hvert sem farið var. Hann stóð sig þó með prýði sem siglingafræðingur um götur Orlando og ekki má gleyma að þakka konunni í bílnum sem talaði við okkur parið og róaði okkur þegar illt var í efni.

Magic Kingdom, Epcot, Universal studios, Florida mall, Millenium mall, Black Angus Steakhouse, Publix, Wallmart, Winn-Dixie, Premium Outlets, Bud-light, Heineken, Hvítvín, Rauðvín, Súkkulaði, Ís, Sund, Sól, Fatakaup, DVD kaup, Bókakaup, Skókaup, Bensínkaup, Matarinnkaup, Svefn, Slökun, Gleði, Hamingja, Hlátur og Grín eru meðal þeirra orða sem hafa skotið rótum í huga Skólastráksins eftir þessa ferð.

Disneyworld var algjör snilld. Sú ferð tók einungis tæpar 15 klukkustundir. Byrjað var á því að fara í Magic Kingdom og skoðað og spáð og spekúlerað þar. Þegar því var lokið var stefnan tekin til Epcot, 2 ferðamátar urðu fyrir valinu. Ferja sem sigldi yfir manngert vatnið sem lá á milli Magic Kingdom og "tengistöðvarinnar" við Epcot. Þaðan var farið með einteina járnbraut. Epcot er nokkuð snotur og skemmtilegur garður, en var þó ekki eins framtíðarlegur og menn vildu meina. Smá uppfærsla á "nýjustu" tækni og vísindum væri ráðleg. Eftir Epcot var farið aftur í Magic Kingdom þar sem Skólastrákurinn snæddi ljúfengan kvöldverð með blossandi fögru ástkonu sinni og síðar um kvöld rölt um garðinn. Í lokin var fylgst með skrúðgöngu þar sem Mikki mús og Andrés önd og allir hinir vinirnir dönsuðu og sungu fyrir okkur heilaþvegnu túristana. Það má segja með nokkurri vissu að þetta hafi verið stærsta atriðið á efnisskránni þarna úti.

Við renndum einnig við í Universal studios sem er að mörgu leyti skemmtilegra heldur en Disney, en það er líka að meira gert fyrir eldri aldurshópa. Gífurlega skemmtileg ferð.

Skólastrákurinn ætlar ekki að hafa ferðalýsingu lengri að þessu sinni, enda eru komin mörg og skemmtileg orð. Þeir sem hafa áhuga á frekari upptalningu atriða úr ferðinni mega bíða spenntir.
Skólastrákurinn og lífsförunautur hans mæla sterklega með Orlando. Þau mæla þó ekki eins sterklega með flugi hjá Icadanlire (stöfum hefur verið víxlað til að vernda einokunaraðila á flugmarkaði Íslands)

Búrhval rak á land við Stokkseyri.

2007-06-20T15:45:00.000Z

Tekið frá mbl.is 20.júní 2007: "Hræ af allt að 15 metra löngum búrhvalstarfi hefur rekið á land við Stokkseyri. Tilkynnt var um hvalrekann í dag og kannaði lögreglan aðstæður í fjörunni nú eftir hádegi. Hvalurinn hefur greinilega legið í fjörunni í einhvern tíma en er þó ekki farinn að rotna mikið."

Það eina sem skólastrákurinn hefur um þetta að segja er: Guði sé lof!

Lögreglan hefur sem betur fer mætt á svæðið. Þannig er mál með vexti að skólastrákurinn hefur nú undanfarna 3 mánuði verið í miklum þrætum við lögregluna á Íslandi. Rannsóknir hans á hvalreka í kringum landið síðastliðin 7 ár benda til þess að raðmorðingi er á ferð um hafið í kringum Ísland.

Skólastrákurinn hefur sett saman prófíl af manninum sem er líklegur sökudólgur.

Hvítur og karlkyns

Aldrinum 20-45

Vanmáttarkennd gagnvart sjálfum sér.

Á til með að taka óvænt bræðisköst.

Líklega haldin ranghugmyndum. Kallar sjálfan sig Ahab í gríð og erg.

Áráttukenndar hugsanir um hvíta hvali.

Pípuhattur, væntanlega til að bæta upp fyrir stærð skutulsins.

Þessi maður er líklegur til að brjóta aftur af sér, og mun gera svo við fyrsta tækifæri. Lögreglan er komin á sporið og er á eftir honum. Það gerir hann reiðan og kveikir undir vanmáttarkennd hans. Hann er sífellt að leitu eftir "hinum eina sanna" eða "þeim hvíta". Hann drepur hvalina og kemur þeim fyrir í fjörunni og sviðsetur hvalreka.

Feitu fólki er ráðlegt að forðast sjóböð og þá sérstaklega albínó fólki.

Hafið augun opin.

Búri ehf kynnir Barnabúr.

2007-03-29T16:11:00.000Z

Nútíma samfélag er meira en firrt. Börn okkar eru stanslaust í fjölmiðlum, misnotkun, lélegar einkunnir, dónaskapur os.frv os.frv. Í kjölfar þess að algjört fjölmiðlafár hefur ríkt varðandi þessi málefni hafa foreldrar orðið ofurnæmir, taugaveiklaðir, hræddir og stressaðir. Heilsu barna þeirra fer stanslaus hrakandi, á meðan ósonlagið þynnist og þynnist þá fitna börnin okkar meira og meira. Þau eru orðin dónaleg vegna þess að þau eyða fleiri klukkustundum á dag í Play-X-Station-Box tölvum, sýna lakari og lakari árangur í skóla vegna lesblindufaraldurs og sinnuleysi foreldra. Kennarar eru hættir að sinna börnunum meðan barnaníðingar leika lausum hala allstaðar og bjóða upp á nammi.

Þið þurfið þó ekki að hafa meiri áhyggjur. Lausnin er komin, og hefur reyndar verið til staðar í lengri lengri tíma. Barnabúr njóta nú sífellt meiri vinsælda hér á landi, foreldrar hrannast í búðir til að kaupa þessi undratæki. Nú þurfa foreldrar ekki að hafa frekari áhyggjur af börnunum sínum.

Í búrunum eru öll þægindi sem hægt er að hugsa sér fyrir nútíma barnið. Færanlegir matardallar, 1L losanlegar vatnsflöskur, litlir speglar og önnur leikföng sem festa má á búrið eða hafa inn í því. Hægt er að velja um mismunandi tegundir botna, mjúkir með trémulningi eða harðir með fylltum pappa.

Barnaverndaryfirvöld standa á gati gagnvart þessum búrum enda er um kraftaverkalausn að ræða.

„ÉG hef nú bara aldrei séð annað eins, þetta eru undratæki. Með þessu áframhaldi verður hægt að uppræta hegðunarvandamál skólabarna án afskipta barnaverndar. Sannkölluð guðsgjöf“

Nú nýverið kom ný tegund af búrum fyrir foreldra offeitra barna. Þessi búr, svokölluð Skinner búr, byggja á hagstæðum styrkingarskilmálum fyrir barnið. Barnið er látið á hlaupabretti til að vinna sér inn fyrir fæðu og drykk. Hægt er að breyta styrkingarskilmálum, en lítill bæklingur fylgir með. Fyrir foreldra þeirra barna sem eru stjórnlaus oft á tíðum er hægt að fá búr með elektróðum í botninum, en þær gefa frá sér stuttan 2000 volta straum.

Langir biðlistar hafa myndast eftir búrunum og ríkir blómstrandi viðskiptalíf í kringum þessa iðju.

VARIST EFTIRLÍKINGAR.

Jesú spilar ekki á Playstation

2007-03-22T11:39:00.000Z

Bráðum fara fermingarnar af stað og allt verður vitlaust. Börnin fara að hrúgast í kirkjunnar til að láta ferma sig. Það fallega við fermingar í dag er það að börnin láta ferma sig vegna þess að þau vilja það. Hverjum gæti dottið í hug að hópþrýstingur spili þarna hlutverk? Það er töff að láta ferma sig. Maður fær að hitta vini sína á kvöldin á skipulögðum samkomum, hlusta á hentugan sannleika um Guð (þó ég haldi því ekki fram að ALLIR fái bara að heyra hið góða og sæta um Guð og Co.), tala um hvað maður fær í fermingargjöf, hvað það verður gaman að troða sig út af kökum og gosi, og síðast en ekki síst, tala um hvað það er yndisleg tilfinning að staðfesta trú sína og baða sig í ljósi og dýrð Drottins. Því út á það gengur fermingin, ekki satt?

Ég held að það sé algjörlega farið framhjá okkur hvað það þýðir að fermast. Jú vissulega eru alltaf einhverjir krakkar sem vita 100% hvað þau eru að fara út í. En ég hef enga trú að því að það sé einhver yfirgnæfandi meirihluti. Fermingin er orðinn sjálfsagður hluti af samfélagi okkar og það þykir óeðlilegt að fermast ekki. Ég man þegar ég fermdist þá ráku allir upp stór augu og voru strax viss um hvað hér væri á ferð. Hann Ólafur Kári er að fermast borgaralega. Hann ætlar sem sagt að komast upp með að sleppa milliliðnum í fermingunni (Guð) og fara beint í gjafirnar. Ættingjar mínir studdu ákvörðun mína 100% og voru ekkert annað stolt af því að ég hefði tekið ákvörðunina um þetta sjálfur. Utan að komandi fólk hugsaði annað.

Var ferming hér í gamla daga ekki meira staðfesting á trú barnanna og hálfgerð vígsla inn í heim fullorðinna? Var samfélagið í gamla daga ekki mun trúræknara heldur en í dag, þegar það var normið að dýrka Guð eða Jesú. Nú virðist öll spennan í kringum fermingu snúast um gjafirnar sem krakkarnir fá og mikilvægi þess að gera það sama og hinir vinirnir.

Hvort að kirkjan sé orðin of væg í þessum málefnum í dag eða að foreldrar ekki nógu duglegir við að upplýsa börn sín um raunveruleika fermingarinnar og merkingu hennar veit ég ekki. Það eina sem ég veit er að fyrir mér á ferming að snúast um trú og –siðfræðilega hluti en ekki efnislega kosti þess.

Pediophobia

2007-03-21T09:05:00.000Z

Það er ekkert fallegt við dúkkur. Þær sitja í myrkrinu heima hjá þér með steinrunnið andlit og dauð augu. Hreyfingarlausar horfa þær út í tómið og stara. Stara á hluti og út í víddir sem við sjáum ekki, sitja þöglar og glotta. Á meðan þær glotta liggur þú upp í rúmi og heldur sænginni þétt upp að þér, því þú veist alveg að þetta er bara dúkka. Þetta er bara dúkka og dúkkur geta ekki gert okkur neitt illt. Þær bara sitja þarna og horfa. Og á meðan þú liggur þétt upp að sænginni þinni í myrkrinu og veltir fyrir þér afhverju þér finnst eins og dúkkan sé að stara á þig, starir í gegnum þig og inn í sálina þína. Hún situr og starir á sálina þína og sýgur úr þér lífskraftinn, þangað til að þú verður ekkert annað en hol skel. Það verður ekkert eftir í þér nema óttinn. Óttinn og hræðslan við það að hún horfi aftur á þig, stari, og taki síðustu mannlegu tilfinninguna þína burt.

Þú ferð fram úr rúminu og labbar að hillunni. Dúkkann situr enn og glottir. „Þetta er bara dúkka, hvað er ég að stressa mig?“ hugsar þú og teygir hendurnar fram. Það virðist eins og tíminn stoppi, allur kraftur rennur úr höndum þínum. Þú stífnar upp, svitnar, nærð ekki að anda. Þú horfir beint á dúkkuna og getur ekki hreyft augun. Varir hennar fara hreyfast, hausinn snýst í hring og skjanna hvít augun glennast upp. Augu hennar grípa þig, skyndilega hnígur þú niður, máttlaus, varnarlaus. Dúkkan horfir ennþá á þig, sýgur nautnalega síðustu krafta sálar þinnar, það eina mannlega sem er eftir í þér. Þú horfir enn í augu hennar, getur ekki vikið þér undan, dauðagrip augna hennar óumflýjanlegt. Lungun í þér lamast, köfnunartilfinning tekur völdin, tilfinning sprettur fram í líkamann í vorkunnarlegum krömpum. Þú iðar um á gólfinu eins og ormur á votri götu. Þú getur ekkert gert. Allt verður dimmt. Sálarkraftar þínir horfnir, ekkert eftir nema líkaminn, tóm skel.

Líkaminn þinn er orðinn hvítur og stífur, þú liggur hreyfingarlaus og starir með tómum augum út í loftið, eins og lífvana postulínsdúkka.

Baugsmálið

2007-02-19T13:59:00.000Z

Baugsmálið alræmda verður sífellt stærra og flóknara. Ef ekki fæst dómur á þetta, þá er sóst eftir dómi á hitt. Þetta er vægast sagt flókið mál og ákvað skólastrákurinn því að leggjast á smávægilega rannsóknarvinnu og komast að því hvað málið gengur í raun og veru út á.

Fyrir u.þ.b. 1000 árum voru til þrettán menn. Þessir þrettán menn skipuðu ríkisstjórn íslands. Þannig var mál með vexti að allir þessir menn höfðu sambönd hjá „manninum“. „Maðurinn“ sá til þess að þessir þrettán aðilar fengju að sitja sem lengst í ríkisstjórn og færði þeim öllum því geislabaug sér til verndar.

Dag einn var einn hinna „þrettán“ úti að labba, við skulum kalla hann Jódas. Jódas hitti þar fyrir mann sem var stór og mikill í sínu landi. Þessi maður hét Ján Ósgeir. Eins og glöggir lesendur taka strax eftir er ekki á neinn hátt að lesa úr þessum nöfnum né tengja þau við persónur í skáldsögum eða raunheimi.

Ján tók hann Jódas á tal og spurði hann hvað málið væri með bauginn. Jódas sagði allt af létta og útskýrði hvernig kraftur baugsins sæi til þess að hver sá sem hann bæri öðlaðist ótakmarkaðan kraft. Ján var fljótur að grípa þetta og hugsaði með sér „Hmmm, ótakmarkað afl... eða ótakMARKAÐSAFL MÚAHAHAHAHA!“

Ján sagði við Jódas að ef hann mætti fá bauginn lánaðan skyldi hann sjá til þess að Jódas gæti fengið kósý vinnu hjá Hagbauk og 12% afslátt á öllum mat í Grísus. Svo varð úr að Jódas tók boði Jáns og afhenti honum bauginn.

Við þetta urðu samstarfsmenn Jódasar ekki ánægðir. Jódas viðurkenndi að hafa svikið flokkinn og selt bauginn sinn á síðasta landsþingi flokksins. Stuttu seinna komst upp um samband flokksins við „manninn“ og var formaður flokksins krossfestur og síðan dæmdur til ævilangrar afplánunar í seðlabankanum. Jódas fór að vinna fyrir Ján og lifði hamingjusamur út ævidaga sína.

Hver kynslóðin á fætur annari hefur heitið því að komast yfir bauginn sem Jódas seldi og koma honum aftur í réttar hendur. Jódas sá fyrir þessu og hefur ávallt komið afkomendum sínum inn á þing með stjórn og séð til þess að baugurinn verði áfram hjá Jáni.

Nýjasti afkomandi Jódasar komst nýlega inn á þing og hefur dreift athygli landsmanna með tali um jarðgöng. Nýverið tók hann upp gítar til að yfirgnæfa þá vondu menn sem vildu komast aftur yfir bauginn. Þessi maður heitir Járni Jódsen.

Fatlaðir fá gula spjaldið!

2007-01-27T21:20:00.000Z

Skólastrákurinn með frétt frá Þýskalandi!

Ungur karlmaður var rekinn af velli á HM í handbolta eftir að hafa upplifað kraftaverk og staðið upp.

Málið var þannig að umræddur strákur hafði verið lamaður alla sína ævi. Hann hafði fengið starf hjá Þýska landsliðinu sem “svalastrákur” en hann sér um að útvega vatn í brúsana fyrir leikmenn. Strákurinn fékk að öllu jöfnu að sitja við varamannabekkinn vegna góðs aðgengis fyrir hjólastóla.

Þegar 10 mínútur voru liðnar af seinni hálfleik fann strákurinn sannkallaðan íþrótta anda streyma yfir líkama sinn þegar þjóðverjar skoruðu. Strákurinn hoppaði upp af kæti og stóð í lappirnar. Þetta var sannkallað kraftaverk. Hann hafði ekki staðið í meira en 10 sekúndur þegar dómari flautar og stöðvar tímann. Drengurinn fær aðvörun og 2 mínútur útaf!

Samkvæmt reglum mega ekki fleiri en einn leikmaður standa á hverri stundu við varamannabekkinn. Eftir hörð mótmæli stráksins og þjálfara liðsins var honum vísað af velli og beint í sturtu.

“ Ich bare veisen ikkert. Ich bare standen upp und hoppen auf das marken bevast skorent. Ich tarven ikke lenguren ge-note das hjolenschtol und kan gibe das wasser auf mine fotts.” Þetta sagði strákurinn, Hermann Von Hjolstoltz, í einkaviðtali við skólastrákinn. Það er óþarfi að taka fram að hann er vægast sagt í sjokki eftir þessa lífsreynslu.

Sannkölluð kraftaverkatíð hefur gengið yfir á HM tíðinni í handbolta. Frakkar töpuðu nú um daginn fyrir Íslendingum og í dag tryggðu þeir sér sæti í 8-liða úrslitum.

Þessi sending var frá skólastrákinum í Þýskalandi.

Áfram Ísland
Sýnið hvað þið getið
Með boltann í netið.

Búskmenn Berjast gegn Brautarbræði

2007-01-22T16:47:00.000Z

Skólastrákurinn hefur ekkert getað bloggað í smá tíma vegna átaka sem hann lenti í við frumbyggja í Afríku. Skólastrákurinn var að vinna grein í tengslum við brautabræði (road rage) og ákvað því að skella sér til Afríku, staðarins þar sem hjólið var fundið upp.

Á þriðja degi ferðar minnar í skóginum varð á vegi mínum tígrisdýr sem því miður virtist vera nokkuð hungrað. Skólastrákurinn var vel þegin tilbreyting í matseðilinn, þ.e.a.s. hvítt kjöt. Til allrar hamingju var ég í nýju Adidas hlaupaskónum mínum og náði því ágætis forskoti á kvikyndið. Til allrar ólukku þá hljóp ég beint inn í lítið þorp sem hafið verið falið fyrir manninum í árþúsundir.

Íbúar þorpsins voru afkomendur þeirra sem fundu upp hjólið og þarf því varla að taka fram að þeir tóku umferðarreglunum mjög alvarlega. Umferðarreglunar sem um ræðir eru ævafornar og komu fram 40000 f.kr. Sökum stífra reglna varðandi umferðina og sérstæða einangrun þorpsins eru umferðarreglunar orðnar að trúbrögðum hjá þessum ættbálki.

Þegar ég kom hlaupandi á blússandi ferð þá sinnti ég ekki ævafornri stöðvunarskyldu við mörk þorpsins. Þorpsbúarnir fönguðu mig í net og hentu mér í dimman kofa þar sem ég þurfti að dvelja við í heila viku á samskipta við fólkið. Það eina sem ég fékk var vatn og ökukennslubækur. Til allrar hamingju voru bækurnar gerðar úr laufum og stafirnir skrifaðir með afgangs kjötseyði úr kvöldmati þorpsbúa og gat ég því borðað bækurnar jafn óðum og ég las þær. Brainfood.

Ég lærði tungumálið og var tekinn í þeirra hóp. Þar lærði ég umferðarreglurnar, siðfræðina á bakvið umferðina og lærði um þá flóknu líffveru sem umferðarmenningin er. Þegar ég hafði loksins lært að gefa stefnuljós, veita séns við akreinaskipti og síðast en ekki síst, lært að stoppa á rauðu ljósi voru þorpsbúar tilbúnir að sleppa mér.

Nú er ég kominn heim og hef hafið að dreifa út boðskap umferðarlaganna. Þetta er lífsreynsla sem hefur breytt mér og gert mig að betri manni. Boðskapinum skal dreift um alla þjóðina og hef ég fengið til liðs með mér lögregluna á íslandi.

Ég vil þakka íbúum þorpsins og höfðingja þeirra, Bíb bíb úm bala. Kona hans ZH-351 fær sérstakar þakkir fyrir góðan mat og sonur þeirra og lærimeistari minn, Brummbrumm Brens!Benz, fær mestu þakkirnar. Án hans kynni ég ekki að keyra.

Takk fyrir.

Syndum spilltur eymdarlýður...

2007-01-07T14:16:00.000Z

Samkvæmt Transparency International er Ísland í fyrsta sæti hvað varðar spillingu ásamt tveimur öðrum þjóðum. Samkvæmt þessum niðurstöðum ætti ekki að vera mikil spilling á Íslandi.

Þegar könnun var gerð á Íslandi voru þáttakendur beðnir um að meta hvort þeir teldu spillingu eiga sér stað í íslenskri pólitík. 1 þýddi enginn spilling og 5 þýddi mjög mikil spilling. Íslensk pólitík fékk einkunina 3,3 en einkageirinn kom í kjölfarið með einkuninna 3,1. Íslendingar telja spillingu hafa verið svipaða síðastliðin 3 ár og telja hana haldast óbreytta næstu 3 ár. Þessar niðurstöður koma eilítið á óvart í ljósi þess að Ísland situr í fyrsta sæti.

Í kjölfar þessara niðurstaða birtist ristastór hola fyrir utan alþingi í dag. Upp úr holunni fóru að skríða ýmsir djöflar en að sögn vitna voru þeir allir klæddir í jakkaföt og voru með skjalatöskur. Það sem þótti enn skrýtnara var að þeir voru allir með einkabílstjóra.

Skólastrákurinn brunaði niður í bæ og náði viðtali við einn djöfulinn. Ástæðan sem djöfullinn gaf upp fyrir komu sinni var sú að hann ætlaði að læra af íslendingum. Orðrómur hafði borist til Helvítis um að íslensk pólitík væri rotin í gegn á mörgum stöðum og að íslenskir pólitíkusar byggju yfir einstökum hæfileikum til að fela þá staðreynd.

Geir H. Haarde boðaði djöflana á fund til sín og setti á laggirnar námskeið fyrir þá. Samkvæmt upplýsingamönnum skólastráksins eru eftirfarandi námskeið í boði:

1. Hvernig á að komast í þægilegt sæti hjá seðlabanka.
2. Hvernig setur maður saman flokk úr afgöngum í pólitíkinni.
3. Nefndavinna og mismunandi aðferðir til að tefja.
4. Hvernig á að komast hjá því að svara spurningum.
5. Að komast í mjúkinn.
6. Að komast í mjúkinn II framhaldsnámskeið.
7. Vinur – Ættingi – Þingmaður – Ráðherra – Sendiherra. Vegurinn að velgengni og þrepin 5.

Nánari upplýsingar um upplýsingar um námskeið má nálgast í síma 1-800-kjóstumig.

Skilnaður skekur skilningslausa þjóð

2007-01-06T21:15:00.000Z

Eftir að upp komst að Magni og eiginkona hans Eyrún ætla að skilja hefur riðið yfir bylgja af skilnuðum hér á litla Íslandi. Ung börn, eftir að hafa lesið yfirlýsingu Magna og Eyrúnar í DV, hafa í tugatali ákveðið að sækja um skilnað við foreldra sína.

Í viðtali við nokkra foreldra kom m.a. annars þetta fram: „Tjah, ég veit nú ekki alveg hvað ég á að segja. Eftir að litla stelpan okkar kláraði grunnskóla þá hefur hún bara verið að fjarlægjast okkur. Hún segir að við séum ekki nógu hipp og kúl. Við erum bara orðlaus.“

Nokkur dæmi eru um það að börn hafi ekki skilið við foreldra sína að borði og sæng en þó hótað því að flytja burt og fá forræði yfir hundinum. Þó eru örfá grófari dæmi um það að börn hafi orðið sér úti um fölsuð skilríki og látið pússa sig saman og farið síðan beint niður á skrifstofu sýslumanns og sótt um skilnað.

Forseti Íslands, Ólafur Ragnar Grímsson, hefur líst yfir neyðarástandi. Hann hafði síðdegis í dag samband við Háskóla Íslands og óskaði þess að fleiri lögfræðinemar yrðu tímabundið útskrifaðir til að anna skilnaðareftirspurn.

Samkvæmt upplýsingum hagstofu voru skilnaðir á árunum 2001-2005 samtals 1076. Gert er ráð fyrir að þessi tala muni áttfaldast á næstu vikum ef ekkert verður að gert.

Þegar skólastrákurinn nálgaðist eitt barnapar sem hafði nú sótt um skilnað 5 sinnum síðastliðinn sólarhring og spurði um ástæðu fékk hann svarið: „Við bara ráðum ekkert við þetta. Við erum bara börn og getum ekki hugsað rökrétt. Þegar við sjáum eitthvað í fjölmiðlum verðum við bara að gera það. Hraði nútímafjölmiðla í firrtu samfélagi okkar hefur umturnað veikburða og mótanlegum hugum okkar, við höfum ekki um neitt annað að velja en að falla að norminu sem fjölmiðlarnir setja okkur.“

S.Ö.K.K.E.R eða Samtök Önugra Karla Kvenna og Einhverra Reykvíkinga hafa sagt að það sé ekki hægt að kenna foreldrum um slíka atburði. „Foreldrar hafa akkúrat enginn áhrif á börn sín. Uppeldi kemur málinu ekkert við og foreldrar geta á engan hátt útskýrt fyrir börnum sínum það sem þau lesa eða sjá í sjónvarpi. Þetta er vonlaus barátta.“ Aðspurð að því hvernig þau gætu fullyrt um þetta vísuðu þau Skólastrákinum á sálfræðinga félagsins sem sögðu: „Við lásum það í bók.“

Þegar þessi grein er skrifuð er ástandið ennþá alvarlegt. Foreldrar eru beðnir um að fylgjast vel með börnum sínum og hafa lélegar afsakanir á reiðum höndum þegar lögregla yfirheyrir þá um væntanlegar ástæður skilnaða.

Saddam hengdur.

2006-12-30T16:24:00.000Z

Leiðtogi þjóðar sem bannar hengingar framselur Saddam og fagnar aftöku hans.

Leiðtogi þjóðar sem fordæmir og bannar aftökur fagnar því að Saddam hafi nú svarað til saka.

Þjóð sem að hafði Saddam í haldi sendir út yfirlýsingu og gerir ráð fyrir hefndaraðgerðum í Írak vegna aftöku Saddams stendur aðgerðarlaus.

Mér finnst þetta allt óttalega skrýtið og stundum finnst mér bara eins og ég eigi aldrei eftir að skilja þessa hluti.

Hvað verður næst?

Verður Bush handtekinn eftir 30 ár og dæmdur til dauða fyrir að hafa fyrirskipað ólögmæta innrás í Írak og verið valdur dauða mörg þúsunda?

Spurning: Ef þú ert venjulegur maður og þú tekur ákvörðun eða gerir eitthvað sem veldur því að annar maður deyr eru venjulega kallaður morðingi.
Ef þú ert pólitíkus og þú tekur ákvörðun eða gerir eitthvað sem veldur því að annar maður deyr, hvað ertu þá?

Stekkjastaur hrekkur um stekk á staurinn...

2006-12-13T14:00:00.000Z

Gleymið Hér & Nú. Gleymið Séð & Heyrt. Gleymið öllu sem þið hafið lesið í DV. Skólastrákurinn hefur nýlokið námskeiði í rannsóknarblaðamennsku og er nú búinn að koma upp um hrikalegt hneyksli.

Nýverið var skólastrákurinn í rannsóknarferð upp á ónefndri heiði til að athuga framkvæmdir virkjunarfyrirtækja. Brá honum heldur í brún þegar hann gengur beint upp að jólasveini sem er á leið sinni niður í byggðir. Skólastrákurinn varð var við einhver ókindar hljóð og gægðist yfir lítin hól. Sá hann þar Stekkjastaur á fullu í fornri bændaíþrótt sem nefnist rollu glíma.

Greyið stekkjastaur varð var við Skólastrákinn undir eins og hljóp í burtu til byggða eins og elding... Stekkjastaur brá reyndar svo mikið að hann gleymdi að setja staurinn sinn aftur í buxurnar og datt beint á hann. TF-LÍF var kölluð út og var Sveinki fluttur á sjúkrahús þar sem hann gengur í gegnum stífar skurðaðgerðir til að laga skaðann ásamt því sem að hann mun væntanlega þurfa á langri endurhæfingu að halda.

Þegar Stekkjastaur var spurður hvernig stæði á því að hann hefði verið aleinn upp á hálendi með afturlappirnar á rollu í stígvélunum sínum meðan hann héldi um horn hennar svaraði hann: „Sko, planið var nú að ná tvöföldum hælkrók og fella hana en viti menn, ég bara rann til. Hún er svo lúmsk hálkan upp á heiði“.

Ekkert hefur spurst til rollunnar sem varð fyrir atburðinum en lögreglan er að vinna í málinu. Fjölmiðlafulltrúi jólasveinanna okkar er að athuga hvort fresta þurfi jólunum vegna atviksins.

Uppfyllingarefni vegna próflesturs...

2006-12-12T15:25:00.000Z

Skólastrákurinn er upptekinn við próflestur og próftöku. Að því tilefni verður birt innsend saga. Verði ykkur að góðu.

Einu sinni var lítið grænt skrímsli sem langaði í ís en mamma hans sagði nei. Það gekk nú ekki upp og ákvað umskrifaður einstaklingur að taka til óskiptra málanna, þá sagði mamman "Nei, maður segir mála hana". Ekki borða svona mikið sagði ljóta svínið og skokkaði á staur. Ái sagði hann við hundinn og konuna sem dó. Eftir allt reyndist heilaæxlið hnas verra en manninn. Þetta var maðurinn sem hafði kveikt gífurlegar langanir hjá söguhetju okkar. Söguhetjan ákvað að sýna honum tattúið sem var svo mikil sýking í, hann kreisti og kreisti og út kom lítill mjúkur og gulur páskaungi sem söng fallega en svo stikaði hann burt í fússi, alveg brjálður eins og kexið hans Óla. Henni þótti það ekkert svakalega gott og hennti því í ruslið.

Áttu börn og buru...

2006-11-19T19:59:00.000Z

Skólastrákinum þykir mikill heiður í því að tilkynna komu nýs barns í þennan heim. Þann 17. nóvember klukkan 3 að nóttu til fæddist 1.stk drengur. Hann kom í heiminn með keisara og var einar 17 merkur og 48cm.

Skólastrákurinn hefur því eignast frænda og getur ekki annað sagt en að hann sé mjög stoltur. Drengurinn er fyrsta barn Þrumuguðsins og meyju hans.

Þann 18.nóvember skrifaði drengurinn ungi undir 27 ára samning við skólastrákinn og mun því hefja ritferli sinn innan 6 mánaða á þessari síðu.

Skólastrákurinn óskar foreldrum innilega til hamingju og óskar þeim mikillar lukku og farsældar á komandi árum.

Þess skal einnig getið að skólastrákurinn er með bráðaofnæmi fyrir bleyjum og barnakúk, en er þó í afnæmingarmeðferð í augnablikinu í þeirri vona að geta einn daginn skipt um bleyjur á ungabörnum.

Peningar friða ekki hinn níska, en gera hann ágengari.

2006-11-14T17:02:00.000Z

Nýverið tók Íslenska ríkið 120.000.000.000 króna lán. Ástæða þessa láns er tvíþætt, annarsvegar ætlar ríkið að auka stöðu sína í erlendri mynt og hinsvegar munu þar af 5.000.000.000 fara í ófyrirséðan kostnað vegna Kárahnjúkavirkjunar.

Skólastrákurinn ræddi við heimildamann sinn innan Seðlabanka Íslands og fékk í kjölfarið rjúkandi heitar upplýsingar. Ástæða lánstöku ríkisins er allt önnur en ríkið gefur upp. Raunveruleg ástæða ríkisins er tvíþætt eins og áður var getið en raunverulegar ástæður munu vera þessar.

Nýverið vann Árni Johnsen stóran sigur í flokkskosningum. Árni er því pottþéttur inn á þing. Þeir 5 milljarðar sem voru gefnir upp sem ófyrirséður kostnaður vegna Kárahnjúkavirkjunar eru í raun og veru ófyrirséður kostnaður vegna komu Árna á þing. Talið er að ríkið muni þurfa þessa upphæð til að leiðrétta væntanlegan fjárhalla sem mun koma með setu Árna, en hann ætlar á næstu árum að byggja sér risastóra höll í Abu-Dhabi.
Restin af peningunum, eða 115 milljarðar munu fara í fjármögnun til frekari ofsókna á Baug. Nýverið á fundi ríkisstjórnar var rætt um að of litlum fjármunum hefði verið eitt í einelti hér á landi og þyrfti að ráða bót á því meini. Ríkisstjórnin gerir sér miklar væntingar um að geta knésett Baug og í kjölfarið farið að leita á Björgólfsfeðga. Bókhald ríkistjórnar sýnir að Björgólfsfeðgar hafi sloppið einkar vel út úr ofsóknum og munu því væntanlega 3 milljarðar fara í undirbúningsvinnu Björgólfsofsóknarnefndarinnar.

Þess má geta að ofsóknir ríkisstjórnar á komandi ári 2007 verða styrktar af Ekstrabladet.

Að vera fylltur fúllri fýlu

2006-11-13T11:59:00.000Z

Skólastrákinum finnst það farið að vera mjög niðurdragandi að fara í kaffisöluna hérna í skólanum. Konurnar sem vinna þar yfirleitt eru svo fýldar og leiðinlegar að það hálfa væri nóg. Hann reynir að mæta þarna með bros á vör og hýr á brún en ekkert gengur eftir. Alltaf sama fýlan, það er kraftaverki líkast ef honum er boðið góðan daginn. Þetta er alls ekki nógu gott. Er einhver sérstök ástæða sem má finna fyrir þessu? Er þetta ættgengur erfðasjúkdómur sem gengur á milli sjoppukvenna?

Skólastrákurinn er á engan veginn sáttur við þessa framkomu og ætlar ekki að láta þetta viðgangast. Skólastrákurinn ætlar í átak. Hann ætlar alltaf að bjóða góðan daginn og vera hress og kátur við starfskonurnar. Hann ætlar með þessari aðferð að ná fram lífeðlislegri svörun hjá konunum og sjá hvort þær geti brosað og jafnvel hreyft augun að einhverju marki.

Þetta er ekkert grín! Fyrir utan það að skólastrákurinn sé viss um erfðafræðilegan þátt í þessum fúlheitum þá er hann einnig viss um að svipbrigðsleysin hjá sjoppukonunum megi rekja til botox. Jú, mælingar á sýrustigi kaffidrykkja sem boðið er uppá sýna að efnið Botofýlíumoxileiðinlegsín eða BOTOX sé til staðar í kaffibrúsum í hættulega miklu magni. Starfskonurnar meðhöndla umrædda brúsa 7-12x á dag ásamt því að neita kaffidrykkja beint úr þeim, þær eru því í hóp sem á auknar líkur á að verða fýldur og leiðinlegur.

Frekari niðurstaða er að vænta frá rannsóknarstofu Skólastráksins, en þangað til er fólk hvatt til að þynna skólakaffið sitt út með eftirfarandi hlutum.

Vatni
Mjólk
Sykri
Prozak

Þess má einnig geta að Skólastrákurinn hefur breytt útliti síðunnar í síðasta skipti í bili, enda er hann kominn með leið á þrotlausri leit hins fullkomna útlits.

Takk fyrir.

Paradigmatic information processing.

2006-11-09T13:53:00.000Z

Ég sit í tíma í sögu sálfræðinnar. Kennarinn hefur verið að útskýra Paradigm síðastliðnar 20 mínútur með þeim fyrirvara að Paradigm sé bull og þótt það séu til meira en 23 útskýringar á hugtakinu þá á það ekki við neitt sem við erum að tala um.Þrátt fyrir þetta sækja á mig hugsanir. Hugsanir um risavaxnar rottur.

En núna er kennarinn farinn að tala um gufuvélar, svo ég ætla að hlusta á hann. Orð eins og stýrifræði, paradigms, heimspeki og gufuvélar boða gott.

Takk fyrir

Að gefnu tilefni...

2006-11-05T12:57:00.000Z

Vegna kvörtunar sem barst í dag þann 5. nóvember hefur skólastrákurinn yfirfarið nýlegustu texta á þessari litlu vefsíðu. Í kvörtuninni kom fram að mikið væri stafsetningarvillur og annan slíkan viðbjóð. Hefur höfundur því farið yfir síðustu sjö færslur.

Færsla: Í fréttum er þetta helst..

...og rússnesku mafínunni. Stafavíxl. Hér má segja að um innsláttarvillu sé að ræða.
...Mjólkusamsalan er ekki talin vera viðriðin málið. Vantar R. Innsláttarvilla.

Færsla:Geimverur hafa gert innrás.

...Ullinn hafði engin áhrif á geimverunar. Hér er um ljóta villu að ræða, orðið ætti að skrifast sem svo: Geimverurnar.

Færsla: Tíminn líður.

...sem er nokkuð ógvekjandi. Hér vantar N í orðið ógnvekjandi. Innsláttarvilla.

Færsla: Hugleysi...

Hér er engar stafsetningarvillur að finna.

Færsla: Nördalegt neyðarástand.

Nátturusinnaðir nördar höfðu ruðst... Hér er orðið nátturusinnaðir skrifað vitlaust því það vantar Ú. Orðið ætti að skrifast sem svo: Náttúrusinnaðir.
...í þeim tilgangi að hreinsa skólan. Hér er erfitt að segja til hvort um sé að ræða innsláttarvillu eða stafsetningarvillu. Orðið ætti að skrifast sem svo: Skólann.
...og óhreinan raftækjareykin. Hér er um stafsetningarvillu að ræða því það vantar eitt N. Orðið ætti að skrifast sem svo: Raftækjareykinn.
...niður í asmaköstum. Hér er spursmál um hvort þetta sé í raun stafsetningarvilla. Samkvæmt ráðleggingum er sagt að orðið ætti að vera astmaköstum en ekki asmaköstum. Nútímaleg íslenska eða ekki, enda er orðið astmi tökuorð held ég.

Færsla: Margt býr í myrkrinu.

... einstaka snökkt og kjökur. Hér er orðið snökkt skrifað vitlaust. Orðið á að vera snökt með einu K en ekki tveimur.
Hálsin þinn stífnar þegar... Hér er nokkuð gróf villa á ferð og algjörlega óafsakandi. Hér vatnar eitt N í orðið Hálsinn.
...tvær ókunnungar sterkar. Hér er ekki um stafsetningarvillu að ræða. Innsláttarvilla.

Færsla: Apar koma til varnar.

Hér er enga stafsetningarvillu að finna.

Skólastrákurinn er að sjálfsögðu niðurbrotinn maður eftir þessa yfirferð. Þótt það sé greinilegt að oft sé um innsláttarvillur að ræða þá eru að læðast inn slíkar kjánalegar stafsetningarvillur að ekki er víst að skólastrákurinn muni ná að jafna sig á næstunni.

Skólastrákurinn biður lesendur sína innilega afsökunar og vonar að þeir sjái sér fært að fyrirgefa honum. Notendur geta nálgast endurgreiðslu í tengslum við netnotkun sem hefur farið í lestur þessarar síðu hjá þjónustuaðilum sínum.

Takk fyrir.

Í fréttum er þetta helst..

2006-10-30T13:07:00.000Z

Skólastrákurinn afskar tveggja vikna fjarveru sína. Lítið fréttnæmt hefur verið að gerast og því ekki talist ástæða til að birta fréttir. En nú hefur nýtt mál komið upp.

Lögreglan í Danmörku er á höttunum eftir íslenskum hryðjuverkasamtökum. Samkvæmt heimildum skólastráksins þá eru þessi samtök beintengd mjólkuriðnaðinum hér á landi og rússnesku mafínunni. Kaupþing banki tengist þessu máli einnig, en grunur liggur á að þeir fjármagni starfssemi Rússnesku mafíunnar í gegnum banka í Lúxemborg.

Undarlegir atburðir hafa átt sér stað út í litlu Danmörku. Mjólkurfélög hafa orðið fyrir miklum skaða og hefur mikil rýrnum á mjólkurvörum átt sér stað. Leyniskyttur eru sagðar hafa stráfellt niður mjólkurkýr í hundraðatali og kettlingar hafa fundist syndandi um í mjólkurkörum hjá stærstu framleiðundunum.

Lögreglan hefur tekið starfsmenn fyrirtækisins Mjólku ehf. til yfirheyrslu varðandi málið. Talið er að mjólka ætli að kaupa upp mjólkurfyrirtæki í Danmörku og nýti sér hryðjuverkamenn og leyniskyttur til að fella allt um koll úti til að geta keypt fyrirtækin á sem minnstu verði.

Mjólkusamsalan er ekki talin vera viðriðin málið, enda er hún á spenanum hér á Íslandi og hefur ekki í huga að leita út fyrir landsteinana.

------ UPPFÆRT! BRJÓTANDI FRÉTTIR ------

Framkvæmdastjóri Mjólku ehf hefur verið handtekinn. Aðspurður sagðist hann hafa ráðið til vinnu mjólkurþyrsta kettlinga til að knésetja mjólkuriðnað í Danmörku. "Þeir munu lepja upp hvern einasta dropa í Danmörku" Sagði framkvæmdastjórinn þegar hann var færður inn í fangaklefa lögreglunnar.

Lögreglan hefur í kjölfarið handtekið kettlinga á heimsvísu sem eru tengdir þessari starfssemi. Rassíur voru gerðar í Rússlandi, Lúxemborg, Danmörku, Íslandi og KBbanka.

Það er hægt að segja með vissu að réttlætið hafi sigrað og enn einni innrásinni á litlu Danmörku hafi verið bugað frá.

Höfuðpaurar samtakanna sitja núna í einangrun í Hrísey og sleikja sárin. Þeir munu þurfa súpa seiðið af súrri mjólk næstu 10 árin.

Geimverur hafa gert innrás.

2006-10-16T12:49:00.000Z

Síðastliðið föstudagskvöld bar mikið á fyrirbæri sem fólk kallar stjörnuhrap. Íslenski herinn með Björn Bjarnason í broddi fylkingar hélt upp á Snæfellsjökul til að athuga stein sem lenti á jöklinum. Þegar upp á jökulinn var komið kom í ljós að þetta voru ekki steinar sem höfðu hrapað til jarðar heldur geimverur.

Mikill skotbardagi var háður þar sem íslenski herinn sýndi vopnafræðilega yfirburði sína. Mennirnir réðust af stað með yddaða heygafla og óvenju beittar hrífur. Þegar bardaginn hafði staðið yfir í 2 mínútur höfðu geimverurnar hrakið herinn á bak og burt. Tekið var til þess ráðs að nota efnavopn! Björn kallaði út allar þrjár landhelgisþyrlunar, en einungis 1 komst á loft þar sem hinar voru í „ástandsskoðun“. TF-SIF komst í tæka tíð að jöklinum og varpaði 800KG af óunninni ull yfir andstæðinginn. Ullinn hafði engin áhrif á geimverunar sem héldu ótrauðar áfram niður jökulinn í átt að siðmenningu. Ekki gafst tími fyrir frekar efnaárásir því TF-SIF var kölluð út á Þingvallavatn til að bjarga fyrrverandi varnarliðsmönnum sem voru í sjálfheldu í árabát út á miðju vatni.

Geimverunar voru með sérstakan líkamsvarnarbúnað sem verndaði þær gegn íslenskum aðstæðum, en hugmyndina að líkamsvarnarbúnaðinum hafa þær fengið frá Hagkaup. Heimildarmenn skolastraksins segja að hópur af grænum og fjólubláum geimverum hafi um daginn komið á Ameríska daga í Hagkaup dulbúnar sem Kanar. Þær hafi sýnt stígvélum sérstakan áhuga, þá helst Nokia og Viking.

Talið er að geimverunar nærist á hugvitsorku frá mannfólki, þar sem þær læðast aftan að fólki, hoppa á höfðu þeirra og hylja það með líkama sínum. Ef þær fá ekki næga hugvitsorku úr fólkinu verður úrgangurinn sem þær gefa frá sér í sérstöku formi. Vísindamenn NASA kalla þennan úrgang Bul logvitl eysa. Þetta kom í ljós þegar geimverur réðust inn á alþingi og hugðust sjúga hugvit úr þingmönnum. Tegund úrgangsins uppgötvaðist þannig að hljóðin sem komu frá þeim sem úrgangur hugvits alþingis voru öll brengluð og vitlaus. Það eina sem heyrðist var:

„Skatthækkun“ „Nefndarvinna“ „Varnarliðssamningur“ „Hleranir“ og síðast en ekki síst „Öll mál liggja til vinnslu“

Lögreglan sótti nú fyrir stundu stjórnmálafræðinema í háskóla íslands og hyggjast beita þeim fyrir geimverurnar undir forysta alþingismanna.

Þegar þessi grein er rituð eru geimverur á miklu undanhaldi.

Tíminn líður

2006-10-07T18:09:00.000Z

Ég var að fatta dálítið sem er nokkuð ógvekjandi. Eftir 17 ár verð ég fertugur. Eruð þið að skilja mig. Þetta er nokkuð stór tala. Þetta er alveg 10+10+10+10!!! En hvað með það. Ég er úrræðagóður ungur drengur. Ég læt fáránlega hluti eins og elli ekki stoppa mig!

Hér eru nokkrar hugmyndir til að koma í veg fyrir elli.

Finndu upp tímavél sem stoppar tímann. Kostir: Þú eldist ekki og verður áfram ungur. Gallar: Tíminn, jú, stoppast. Allt í kringum þig stoppar, þar á meðal þú, þannig lífið gæti orðið dálítið leiðinlegt til lengdar ásamt því að vera nokkuð dýrt í framkvæmd.

Farðu og ráfaðu um sléttur Síberíu. Samkvæmt heimildum hafa velvarðir loðfílar fundist þar. Ef þér tekst að frosna þá hættir þú að eldast. Frumurnar þínar geymast vel. Kostir: Þú eldist ekki, þetta er ódýrt.

Farðu í Botox einu sinni í mánuði næstu 80 árin. Kostir: Þú helst voðalega unglegur og allir munu dýrka þig fyrir líkamlega fegurð þína. Gallar: Mjög dýrt, möguleiki á Botox eitrun vegna langvarandi notkunar. Gúmmíhúðarsjúkdómur gæti fylgt í kjölfarið.

Búðu til farartæki sem ferðast um á ljóshraða. Þú flýgur í kringum jörðina og nærð að eldast hægar en aðrir. Kostir: Voðalega gaman að ferðast svona hratt og þú eldist mjööög hægt. Gallar: Líkaminn þinn mun sennilega ekki þola ljóshraða og verða að klessu samstundis.

Þegar betur er á litið kemur það í ljós að kannski er nokkuð erfitt að forðast ellina. Eitt ráð hefur þú dugað í gegnum aldirnar. Konur hafa lengi vel notað þessa aðferð við elli og eru hálfgerðir snillingar í henni. Við karlar skulum því leita til kvenfólksins til ráðlegginga. Ég fann einnig forna uppskrift við elli í skjalageymslu ættar minnar.

1.DL Afneitun
7 Bollar hrukkukrem
2 Skeiðar af yngri maka á tveggja ára fresti
300GR af gelgjufötum

Hristist saman og bakist í hugarheimi hvers og eins í ca. 80 ár. Hrærið í og bætið við eftir þörfum.

Hugleysi...

2006-10-04T17:44:00.000Z

Ég ætla að biðja þig kæri lesandi um eitt.

Tæmdu huga þinn. Lokaðu á öll áreiti í kringum þig.

Ég ætla að biðja þig um að hugsa ekki um mörgæsir. Sama hvað þú gerir þá mátt þú ekki hugsa um mörgæsir næstu 15 sekúndurnar. Mörgæs er sú hugsun sem er ekki leifð.

Í stuttu máli sagt.

EKKI HUGSA UM MÖRGÆSIR Í 15 SEKÚNDUR.

Sá sem nær þessu fær sérstök verðlaun.

Nördalegt neyðarástand

2006-10-03T20:25:00.000Z

Kalla þurfti út lögregluna í Reykjavík í dag vegna umsáturs um Háskóla Íslands. Nátturusinnaðir nördar höfðu ruðst inn í byggingar skólans og tekið völdin. Nemendur og kennarar urðu fyrir miklu aðkasti að völdum nördana, en þeir voru komnir í þeim tilgangi að hreinsa skólan af „Stafrænni illsku“.

Nördanir gerðu upptæk ýmis nauðsynleg tæki sem fólk þarfnaðist. Vasareiknum var stolið ásamt fartölvum og stafrænum klukkum. Öllu þessu var safnað saman fyrir framan aðalbygginu og brennt. Þegar eldurinn logaði sem mest rifu þeir sig allir úr fötunum og hófu að þylja töfraorð sem rekja má til fyrstu nördanna á steinöld.

Stafræn illskan svíkur þig
Rommballa sjúmballa digitalibomm
Tekur síðan burtu þitt menningarstig

Látið ekki vélar gera mannaverk
Rommballa sjúmballa digitalibomm
Því þær eru gerðar af Satans klerk

Frelsaðu okkur frá vélavæðingu
Rommballa sjúmballa digitalibomm
Svo við fáum ekki heilablæðingu

Eftir öll átökin við dansinn og óhreinan raftækjareykin frá eldinum duttu nördarnir niður í asmaköstum og voru teknir í hald af lögreglunni.

Margt býr í myrkrinu

2006-10-02T12:14:00.000Z

Í myrkrinu stendur maður...

Þú labbar í rólegheitum eftir löngum snúnum göngum. Þú veist ekki alveg hvar þú ert, eina sem þú veist er að þú vaknaðir á þessum ókunnuga stað. Gangarnir eru illa viðhaldnir, pípulagnir standa berar úr loftinu og leka. Rakalyktin loðir við loftið og þú heyrir ekkert annað en dimman hlátur bergmála allt í kringum þig einstaka snökkt og kjökur.

Í myrkrinu stendur maður...

Þú labbar áfram eftir göngunum og áttar þig á því að þú ert ekki ein. Þú heyrir í þínum eigin fótatökum og þungan andardrátt þinn. Þú heyrir líka önnur fótatök sem eru aðeins hraðari en þín. Þú stoppar og öll hljóð í kringum þig þagna samstundis.

Í myrkrinu stendur maður...

Allt í einu rísa öll hárin aftan á hálsinum þínum. Kaldur stingandi hrollur brunar niður líkama þinn eins og þruma þegar þú finnur heitan andardrátt aftan á hálsinum þínum. Hálsin þinn stífnar þegar tvær ókunnungar sterkar hendur grípa mjúklega um hann og byrja hægt og rólega að kreista. Hendurnar á þér stífna, þig langar að anda og þú finnur hvernig svitinn sprettur fram. Maginn á þér fer í hnút, hjartað byrjar að slá hraðar og vöðvarnir fara að titra. Þú slærð frá þér og hleypur í burtu. Öll hljóð í kringum þig magnast, snöktin, kjökrið og dimmur hlátur. Þú hleypur lengra og lengra, hraðar og hraðar en veist samt að þú ert ekki sloppin.

Í myrkrinu stendur maður...

Þú dettur og rekur þig utan í ryðgað járn. Þú finnur heitt blóð renna niður síðuna á þér, þú finnur hvernig sársaukinn rekur þig áfram. Þú ert orðinn móð, þreytt og óglatt. Þú stendur upp og ætlar að halda áfram en það er of seint.

Yfir þér stendur maður í myrkrinu og hlær...

Apar koma til varnar.

2006-09-27T22:08:00.000Z

Apar hafa verið fengnir til vinnu á Íslandi. Verkefni þeirra mun snúa að vörnum Íslands. Samkvæmt upplýsingum frá dóms og kirkjumálaráðherra er þetta partur af auknu framlagi Íslands til hjálpar í þróunarlöndum.

Aðspurður um þetta mál svaraði Björn: "Tjah, við vorum nú bara á fundi með SÞ og varnarmál Íslands komu til tals. Við könnuðum málið og komumst að því að þetta væri mjög svo góð niðurstaða. Okkur vantar varnir í landið og Afríku vantar pening."

Fréttaþjónusta skólastráksins tók viðtal við einn af ræðismönnum Afríku á Íslandi í dag. Umbala MukMuk Kahele sagði " Spurningin var hvað hægt væri að gera með varnarmál Íslands. Við höfðum svarið. Hvernig er hægt að skipta út illa lyktandi, sveittum og náttúrumengandi hermönnum. Svarið blasti strax við okkur. Apar. Apar eru sveittir og illa lyktandi en menga ekki eins mikið."

Með tilkomu Apa hjá Keflavíkur flugvelli er talið að mengun minnki um allt að 45% á fyrstu 3 árunum. Bananahýði hafa einstakan hæfileika til að draga upp úrgangsefni úr jörðinni og svo kemur náttúrulegur áburður frá öpunum á móti til að endurfrjóvga jörðina.

Fyrstu aparnir koma til Íslands eftir 4 mánuði en þeir munu fara í þjálfun hjá landhelgisgæslunni og læra að fljúga þyrlum og sinna björgunarstörfum.

Í viðtali við Æðsta höfðingja apasveitarinnar hér á landi, Górill A. Grábak, sagði hann " Ook ook, cheek cheek oop oop chheeeee... ook?"

Íslendingar bíða í ofvæni eftir að varnir Íslands verði endurreistar og verður gaman að sjá hvað verður úr þessu samstarfi. Þess á geta að fyrirtækið Bananar ehf mun að mestu leyti sjá um þjónustu við apana.

Hænur ATH!!

2006-09-23T20:21:00.000Z

Hænur á suð-vestur horni landsins hafa tekið sig til og sent út viðvörun til annara landshorna vegna ungs manns sem keyrir um landið og lokkar til sín ungar hænur með korni og nýtir sér svo aðstæður sínar á hinn versta hátt. Samkvæmt fréttaritara okkar á Skúfskumsskaganesi hafa hænur þar einnig orðið varar við farir þessar manns. Þær segja reynslu sína af manni þessum ekki vera góða.

„Ég stóð þarna bara út á horni og var eitthvað að gogga í jörðina þegar þessi maður kemur. Hann bauð mér hænukorn og svo man ég bara ekki meir“ segir Hrefnþrúður H. Kambsdóttir. Leifar af sterku kjúklingakryddi frá Knorr (KK á svarta markaðinum) fannst í korninu og talið að ungi maðurinn kryddi kornið fyrst til að ná fram lyfjahrifum á hænurnar.

Hænur víðsvegar um land eru beðnar um að þiggja ekki korn af ókunnum bóndum eða öðrum mönnum. Lögreglan er með málið í sínum höndum, en Haukur Fálkason yfirrannsóknarfugl hefur þegar fengið nokkrar ábendingar.

Mói Hanason yfirkjúlli á búinu í Skúfskumsskaganesi segir að ekkert sé að óttast með hænur fari að öllu með gát og ibbi ekki gogg að hverjum sem er.

Asmalegar ismapælingar.

2006-09-20T08:07:00.000Z

Einu sinni var maður. Hann vildi rannsaka hvert náttúrulegt grunneðli mannsins væri. Allir hrópuðu húrra og var hann talinn aðdáandi náttúruisma. Síðan sagði hann "Við getum ekki sýnt fram á ákveðna þætti grunneðlis mannsins með rökum eða þekkingu, hvernig getum við verið viss um eitthvað sem kannski ekki er". Allir púuðu og sögðu að hann væri ekkert annað en andskotans aðdáandi skeptisma. Maðurinn svaraði fyrir sig "Ég er ekki skeptisti, ég er post skeptisti eða móderískur skeptisti og þá varla það. Ég vil reiða mig á efahyggju, en þó innan marka þess sem skynsemin segir til um. En eitt ætla ég að segja ykkur, og það er að skynjun er okkar besta, ef ekki eina leiðin til þekkingar á heiminum". Þá stoppuðu nú allir og þögðu í smá stund, þetta var eitthvað sem þau vissu ekki hvað var, þannig þá fékk maðurinn nýjan stimpil. Nú var hann orðinn Sálfræðilegur Atómisti.

Nú spyr ég? Hvað er þessi maður?

Er hann náttúrusinnaður skepitsti sem aðhyllist postskeptisma en líkar vel við móderískan skeptisma en er þó í raun sálfræðilegur atómisti?

Eða er hann Postmodernískur skeptisti sem vill vera nátturuhyggjumaður en getur það ekki alveg því hann er sálfræðilegur atómisti.

Er hann Sálfræðilegur Atómismi sem er móderísk skeptískur á náttúrhyggjuna en þó mest skeptískur á sjálfan sig því hann finnur ekkert sjálf þegar hann nýtir sér innlit?

Ég svo sannarlega veit það ekki! Ég er ekki alveg að kveikja á þessu, en ef það er einhver þarna úti sem er með lykillinn að allri sögu sálfræðinnar má hann eða hún endilega hafa samband.

Takk fyrir.

Táslur

2006-09-18T13:08:00.000Z

Um daginn fór ég að spá voðalega mikið í táslum. Ákveðinn partur af fólki sem er okkur mikilvægt þekkjum við fyrst og fremst í gegnum táslunar þeirra. Stoppið aðeins og hugsið um þetta.

Fyrstu kynni okkar af móður okkar: Við komum á blússandi ferð í miðri fæðingu og stingum hausnum út, og það fyrsta sem við sjáum, fyrir utan hendur fæðingarlæknis, eru táslunar á mömmu okkar. Það er ekki fyrr en nokkrum mínútum seinna sem við fáum að sjá framan í hana. Þetta er hægt að styðjast við í nokkurn tíma þar sem að smábörn eyða miklum tíma á gólfinu og sjá fætur og tær ættingja og gestgangandi.

Annað dæmi: Nuddarar og sjúkraþjálfarar.

Ég mæti í tíma til sjúkraþjálfara. Sé framan í hana í kannski 30 sek meðan hún heilsar mér og segir mér að skrattast í klefa 2. Eftir það er maður með hausinn í gati á bekk og sér ekkert annað en tærnar á henni.

Talandi um að mynda óheilbrigð tengsl við fólk sem er mikilvægt.

Fyrstu kynni af aðal áhrifa valdi lífs þíns – Táslunar á mömmu.
Komandi kynni af félagslega mótandi aðilum – Táslunar á ættingjum og vinum.
Helstu sjónrænu kynni af meðferðaraðilum – Táslunar á sjúkraþjálfaranum þínum eða nuddara.
Fyrstu tengsl við besta vin á fyrsta fylleríi – Tærnar hans þar sem hann stendur þér við hlið meðan þú liggur á hnjánum og ælir.

Þetta er ekkert einsdæmi og má rekja þetta allt yfir í kristna trú og múslímatrú. Fylgist með hvernig múslímar krjúpa djúpt við bænir, ef enginn annar en Allah myndir birtast þá myndu þeir fyrst sjá tærnar. Kristið fólk, krýpur í kirkju við táslur prestins.

Svona heldur þetta áfram út allt okkar líf þar til við drepumst. Hver er okkar síðasta sjón þegar við liggjum með lappirnar út í loftið alveg að drepast... jú.... táslur.

Reynum því að muna að halda tám okkar snyrtilegum... þú veist aldrei hverjum þú kynnist.

hlutabref.is

2006-09-12T17:05:00.000Z

Ég rakst á ansi skemmtilegan leik á netinu í dag. Þetta er hugverk 5 fyrrverandi nema úr HR (Háskóla Reykjavíkur). Þeim fannst vanta fræðslu um hlutabréf hérna heima og ákváðu að taka í sínar hendur að búa til leik sem byggir algjörlega á hlutabréfamarkaðinum hérna heima.

Leikurinn er mjög raunverulegur að því leyti að hann byggist upp á raunverulegum gildum hlutabréf á ICEX markaðinum. Það er þó einn munur, en í leiknum er tekið fast þóknunargjald upp á 1%, en þetta þóknunargjald er misjafnt í raunveruleikanum.

Leikurinn er algjörlega frír og byrjar hver þátttakandi með 1.000.000 kr í pening (gervipening þó þvímiður) og svo er bara að byrja að kaupa og selja.

Það er hægt að nálgast allskonar fræðsluefni á síðunni um hlutabréf og aðra skylda hluti. Skemmtilegt framtak í alla staði. Tékkið endilega á þessu :)

Óhagstæðir styrkingarskilmálar fyrir háskólanám.

2006-09-11T13:05:00.000Z

Nú er svo komið að ég er að stúdera sögu sálfræðinnar. Ég hef tekið eftir því að þegar ég les bókina í þessu fagi, þá leitar yfir mig þessi svakalegi svefnhöfgi. Þetta lýsir sér þannig að maður er að gera eitthvað, og sofnar svo allt í einu. Ástæðan fyrir þessu er einföld og liggur í uppeldinu hjá mörgum börnum.

Mörg börn eru alin upp við það að sögur séu lesnar fyrir þau rétt fyrir svefninn. Það er allt gott og blessað. Það þjónar vissulega sínum tilgangi, enda sofna þau fljótt og þumalputtareglan er jú, því fyrr sem þau sofna því fyrr halda þau kjafti.

Ókosturinn við þetta kerfi er sá að þetta fylgir okkur út alla okkar mannsævi. Það vottar fyrir þessu á öllum skólastigum ævigöngu okkar. Leikskóla, grunnskóla, menntaskóla og svo loks háskóla.

Við getum sett þetta upp í lítið módel.

Helstu hugtök: ÓÁ (Óskilyrt áreiti)
SÁ (Skilyrt áreiti)
ÓS (Óskilyrt svörun)
SS (Skilyrt svörun)

Mamma kemur með bók og les sögu{ÓÁ} - - - - Barnið sofnar {ÓS}

Þetta gerist nokkrum sinnum og barnið fer að para saman söguna og þreytu. Síðan gerist þetta:

Barnið sér sögubók{SÁ} og verður þreytt og sofnar {SS}

Þetta fylgir okkur út í gegnum lífið, og er stórfengilegur galli. Hættum að lesa fyrir börnin okkar, við eigum betra skilið.

Við erum ekki hundarnir hans Pavlovs.

Hættulegur súrsunarfaraldur!

2006-09-09T20:47:00.000Z

Í kjölfar fuglaflensunnar sem hefur tröllriðið heiminum undanfarið hefur komið upp nýr faraldur. Hann hefur verið kallaður súrsunarfaraladur en hann stafar óbeint af fuglaflensunni. Eftir að flensan kom upp tóku bændur og aðrir borgarar að súrsa matinn sinn í lengri tíma til að drepa vírusinn og hefta þannig smit á milli manna. Eftir að fólk fór að neyta þessa matar fór að fjölga tilfellum þar sem fólk einfaldlega dó eftir matinn. Óvíst var í byrjun hvað olli þessu, en nú hafa rannsóknir sýnt að þegar súri-þátturinn, “The S-Factor” eins og þetta er kallað af læknum, bindist við H5N2 veiruna verða súrsunaráhrifin banvæn.

Jákvæðu fréttirnar eru þó þær að þeir sem lifa faraldurinn af eiga mun auðveldar með að næla sér í kvennfólk, en það er vegna svokallaðra blikkhrifa sem eru einkenni vöðvastífnunarsjúkdóms, muscularis facius hyperstrekkingus, sem fylgir faraldrinum.

Við íslendingar eigum okkar eigið kraftaverkadæmi, en það er hann Jón Jónsson. Jón lifði af súrsunarfaraldurinn fyrri, sem kom upp í þorraveislu árið 2005. Hann er núna stoltur 2ja barna faðir og vinnur fyrir Blikksmiðjuna Gretti.

Blikksmiðjan Grettir,
Við notum ekkert helvítis súrál.

Golfarar

2006-09-09T11:22:00.000Z

Í kjölfar þess að slökkva þurfti á kjarnorkuofni í Noregi sökum þess að viðvörunarkerfi fór í gang hafa furðulegir hlutir verið að gerast í Noregi. Heimildarmenn segja að enginn leki hafi orðið, en nú hefur komið í ljós að svo er ekki. Alvarlegar aukaverkanir hafa átt sér stað og þeir sem verstu komu út voru golfarar sem voru við leik nálægt kjarnorkuverinu. Geislavirknin er sögð hafa breytt uppröðun gena á DNA þráðum golfara og gert þá að svokölluðum ofur-golfurum.

Norsarar binda miklar vonir við þessa nýju tegund golfara, en þeir telja komin tíma á að Norsarar vinni stórmótin sem eru framundan á næsta ári. Við fylgjumst spennt með árangri Norsara og óskum þeim til hamingju með hamfarinar.